October 9, 2016

28th Sunday

Olu nga mabibbig

Ym mabibbig ay nala tam mekarua nga libru nap Patul ira. (2Kings: 5: 14-17)
Mine si Naaman tab bannag na Jordan, ay naminpitu nga nallugg tad danum
tak kunna nebilin ni Eliseo sa; tak kunnud, nammapia y leprosia na.
Nammapia y tabbi-tabb na anna kunna tabb na abbing y nabbalinan na.
Nattoli yaya tak kani Eliseo tuange tak kakavulu na, ay kunna nga kinagi sa,
Sangaw, amm ngana tu awan tu dios a megitta ta Dios na Israelita ira.
Lagud, ykall m, Afu, ay alawatam mu y itavvung ku nikaw.
Netabbag ni Profeta Eliseo, Itabb tas sigga- matolay nga Dios nga yaya y
passerbiak ku, tu ariak ku alawatan y anni laman nga tavvung mu.
Y pili ni Naaman nga alawatan ni Eliseo y tavvung na, ngem manak laman si
Eliseo. Tak kunnud, kinagi ni Naaman sa,
Nu ariam mu alawatan y tavvung ku, ipamavulum mu gafu tu mangilabb
ng tad davvun nga akkatan nad dua nga baka, ta mamegafu sangaw,
ari ng ngana nga mangitavvung tas sakrificio onu mangiyaw tam mattuggi
nga tavvung maski sinni nga sinan-dios, fuera laman tay Yafu!
Y uvovug nay Yafu!

Salmo Responsorio
Tabbag:

Nepakannammu nay Yafu tas nasion ira

y makapaliag nga pakawayya na!

1. Makkansiok kamu tay Yafu

tab bagu nga kansion,
ta makapabbaw y gannug
ira nga kingngua na!
Nangaffu yaya gafu tap pakapangngua
annam masanto nga sikan na.
2. Y nepangaffu nay Yafu
ay enna nga nelammuyag;
nepakannammu na tan nasa-nasion ira
y pakapangngua na nga namaliag.
Zinaddam na y netabba na ta taga Ysrael ira,
megafu tak kekatalo annam mannanayun
nga pangaya na nira.
3. Y nepangaffu na Dios tam
ay nemammatan na ngamin
nga totolay ta tangaravvunan.
Makkansiok kamu nga sigga-pagayaya tay Yafu,
sikamu ngamin nga pinaratu;
ikansion nu sa y paddaya-rayaw nu,
sigga-pagayaya nga makkulle kamu

Mekarua nga Mabibbig

Y mekarrua nga mabibbig ay nala ta mekarua nga tura ni San Pablo kani
Timoteo (2 Tm 2: 8-13)
Daddamman nu si Jesucristo nga naginnolay anna naggafu tag gaka ni
David. Yaw y mapia nga Dumug nga tuddu-tuddu.
Yatun tu mazzigariga nga kunna tadday nga criminal nga agga-fuku, ngem
y uvovug nad Dios ay ari mafuku.
Yarn tu attammak ku ngamin y adde na, megafu laman tat totolay ira nga
pinili na Dios; tapenu mala da gapa y kapaliag
nga maggafu kani Jesucristo, anna mala da gapa y mannanayun nga dayaw.
Kurug yaw nga akkagianan: Nu netangesipo ittam tap patay na,
makipattolay ittam gapa noka sa.
Nu magat-attam ittam taz ziga-riga, makipammaguray ittam gapa noka sa.
Nu kagiat tam tu ariat tam nga ammu yaya,
arian na ittam nga pallikuran ta arian na nga awayya nga pallikuran y baggi
na.
Y uvovug na Dios!

Evangelio

Pari:
Y Yafu egga paray nikamu
Totolay: Kunne nikaw gapa.
Pari: Mabibbig y Santo Evangelio ni Yafu tam nga Jesucristo kunna
netura ni Lucas
(Lk 17:11-19)
Totolay: Gloria nikaw Afu!
Pari: Tap pappange ni Jesus ta Jerusalem, nattalebag yaya tal lugar ira nga
nakkapingitan nas Samaria anna Galilea.
Turi ta tullung ta tadday nga barrio , zinafung yaya nam mafulu nga tolay
nga malleproso.
Nanaddag ira tam mediu arayyu anna kudda nga nekulle, Jesus, Afu, ikallo
nakami!
Tap pakasingan ni Jesus nira, kinagi na,
"Ume kamu mappasingan tap papari. Tak kegga da pagalaman tad dalan,
nammapia ira. Y tadday nira ay Samaritano.
Tap pakatageno na tu nammapia yaya ngana, nanoli kani Jesus anna
nakkukkulle nga naddaya-rayaw tad Dios.
Nappalittukag anna nakkummag yayya ta arubang na anna nabbalo-balo
sa.
Ay kinagi ni Jesus, Ari kari tu mafulu y nammapia? Sitaw y gian nas siam?
Ngatta ta yaw laman nga dayu nga Samaritano y nanoli nga nabbalo-balo
tad Dios?
Ay kinagi na ta tolay, Tumaddag ka anna lubbe ka ngana. Nammapia ka
megafu ta angngurug mu.

Y masanto nga Evangelio nay Yafu

MANGURUG
Mangurug nga-k tad Dios Ama nga makapangua sangamin,
a nonolay pa tal langi anna nanolay pa ta davvun.
Mangurug nga-k ta Dios An nga ya ga y siminolay,
anna mevuya tu Yama adde na sinasinolay.
Nebussi ta megafu ta Espiritu Santo laman
ta san ni Santa Maria nga Virgen a melawa.
Yafu tam a Jesu-Cristo, kuttam ngamin sa lagud
ta nakizzigarigatan na y nakipapatay ta Cruz.
Tu inipanavvu na nittam a minattagaruli,
anna natanam pa ngem naginnolay ta mabi.
Ay nu ta ikatallu aggaw na patay na a kurug,
kagian na Santo Evangelio tu nabbangun ta livvun.
Anna nappanaga gapa ta utun na mundo aw,
adde ta une ta langi ta ikappa-ta-fulu-aggaw.
Kurugat-tam tu manoli y Yafu tam aw gabba;
mamanunnu noka ta adde na ana-ana ni Adan.
Mangurug nga-k pa ta Dios Espiritu Santo gabba;
kurugak-ku y Santa Iglesia, tuange ta ipakurug na.
Kurugak-ku y pattagappo na Cristianos a masippo;
Dios pa y mangi-pennanama ta keyawa na kapakoma.
Iddanamak-ku gapa y kegga na paginnolay,
ay tu ngamin y totolay mannanayun ta ngangangay. Amen.

Prayers of the Faithful

(Indigenous Peoples' Sunday)
Pari: Dios Ama y mangiyaw ta ngamin nga mapia, anna iyawa na nittam
y siki-sikan na nu kuruga mawag tam ngana. Mammacatal ittam nga
makkiddao Sa, anna idasal tam...
Tabbag: Afu tudduan na kami nga mappabal Nicau!
1. Para ta Santa Iglesia totolay na Dios, mappabal da nacuan ta Dios Ama ta
regalu na attolay anna kapaliaran
ta pagideddu, pangigafu anna siki-sikan. Maddasal ittam ta Yafu!
2. Para ta mammaguray nga politico, egga nacuan ammacacua ta
negagangay nga nemammatan na Indegenous nga totolay,
ibita da nacuan y maski anni gannug nga mattagikukua nga mappagimmang
ta pattullu na kultura
onu macadaral ta davvun nga paddianadda. Maddasal ittam ta Yafu.
3. Para danuri makkarag nga trahabador ira anna awan ta gobierno nga
pagara-ammung:
egga paray y canayun nga suporta da ta totolay ira nga magalan tu
Indegenous tapenu y kukua nga nemammatad da ta ginafa-gafu,
cultura, paka-awayya anna kinapia na pallevu da ay mesiggalo nacuan anna
mereserba. Maddasal ittam ta Yafu!
4. Tapenu danuri totolay nga magalan tu Indegenous Filipinos mayatadda,
anna ayatadda gapa y pia na ginafa-gafu nga cultura da
nga nepasingadda ta kataggitadday, ta karwan nga totolay anna davvun nga
kinarigatad da. Maddasal ittam ta Yafu!
5. Para ta ngamin nga familia onu taganakan, egga nacuan pakkarag da
nga mamakoma anna makitagapia,
ta canayun nga pangipasingan ta pangiyawa ta tabarang onu pakkaanugutan. Maddasal ittam ta Yafu.
6. Para ta makkataki anna danuri massufri ta taki nga awan tu pammapia na,
masingadda nacuan anna matageno da y ay na Dios ta totolay
nga manangngal anna magideddu nira. Maddasal ittam ta Yafu.
Pari:
Dios nga Ama, ariam mu itul tu baggi mi laman y tangngawam mi, ngem
pabbalinam mu cami nga curug nga tolay ta communidad,
vuk y futu ta totolay, anna maawag da ira. Kiddawam mi yaw kani Cristo
nga Yafu. Amen.