ābād raheñge vīrāne shādāb raheñgī zanjīreñ

jab tak dīvāne zinda haiñ phūleñgī phaleñgī zanjīreñ

āzādī kā darvāza bhī ḳhud hī kholeñgī zanjīreñ
TukḌe TukḌe ho jā.eñgī jab had se baḌheñgī zanjīreñ
jab sab ke lab sil jā.eñge hāthoñ se qalam chhin jā.eñge
bātil se lohā lene kā elaan kareñgī zanjīreñ
andhoñ bahroñ kī nagrī meñ yuuñ kaun tavajjoh kartā hai
māhaul sunegā dekhegā jis vaqt bajeñgī zanjīreñ
jo zanjīroñ se bāhar haiñ āzād unheñ bhī mat samjho
jab haath kaTeñge zālim ke us vaqt kaTeñgī zanjīreñ

dariyā ho yā pahāḌ ho Takrānā chāhiye

jab tak na saañs TuuTe jiye jaanā chāhiye
yuuñ to qadam qadam pe hai dīvār sāmne
koī na ho to ḳhud se ulajh jaanā chāhiye
jhuktī huī nazar ho ki simTā huā badan
har ras-bharī ghaTā ko baras jaanā chāhiye
chaurāhe baaġh buildingeñ sab shahr to nahīñ
kuchh aise vaise logoñ se yārānā chāhiye
apnī talāsh apnī nazar apnā tajraba
rasta ho chāhe saaf bhaTak jaanā chāhiye
chup chup makān rāste gum-sum niDhāl vaqt
is shahr ke liye koī dīvānā chāhiye
bijlī kā qumquma na ho kaalā dhuāñ to ho
ye bhī agar nahīñ ho to bujh jaanā chāhiye

bār-hā gor-e-dil jhañkā laayā

ab ke shart-e-vafā bajā laayā
qadr rakhtī na thī matā-e-dil
saare aalam meñ maiñ dikhā laayā
dil ki yak qatra ḳhuuñ nahīñ hai besh
ek aalam ke sar balā laayā
sab pe jis baar ne girānī kī
us ko ye nā-tavāñ uThā laayā
dil mujhe us galī meñ le jā kar
aur bhī ḳhaak meñ milā laayā
ibtidā hī meñ mar ga.e sab yaar
ishq kī kaun intihā laayā
ab to jaate haiñ but-kade se 'mīr'
phir mileñge agar ḳhudā laayā